اليوم اريد اسولف بالغة القندرجية الدارجة وهذا حق طبيعي  .بعض الشغلات والسالفات نادرة الحدوث في حياة البنيادم مثلآ بداية القرن يعني مثل سنة الفين يعتبروها بداية قرن يعني لازم الواحد ينتظر بعد مئة سنة حتى تمر علية بداية قرن او بالعراق مثلآ مرور اربعة وعشرين ساعة يعني يوم كامل بدون ماتطفة الكهرباء الوطنية يعني هذا الموضوع مايصير لويجي قبيس  واذا صار لازم نحتفل وندك هجع وبزخ للصبح وتجي الفضائيات تصورنة عبالهم صانعين قنبلة ذرية ونحتفل .او ذكرى انشاء الاتحاد الفدرالي الامريكي او انشاء الاتحاد السويسري .او ذكرى مطالبة صلاح الدين بالفدرالية ..

المهم من هاي المقدمة الجلجلوتية وفي اطار حملة التمسلت السياسي الي بعض  المنتشرة بهل يومين حول موضوع الفدراليات وبينما يطلع علينة بالملون بين فترة وثانية سياسي ضاربتة المحاصصة دفرة ومايدري شلون يدبر رواتب الحبربش مالتة راس الشهر ويريد حصتة من كيكة اسمها الوطن  علية قرر بعد استشارة دول الجيران ان يطالب بأقليم على امل ان توفي عوائدة خوش دخل تاليهة ويصير  زعيم براس لقندرجية وعلى اعتبار التجربة اكبر برهان راح اسولفلكم سالفة وانقل الكم رأي شخص بسيط صاحب محل اسكافي (قندرجي) ودتني رجلية يمة يوم الجمعة الفايت توجهت بالسؤال لهذا العزيز وطلبت رأية سألتة شتكول لو نصير اقليم صفن صاحبي صفنة  عبالك راح يصنع صاروخ يطيرنة للقمر وسألني سؤال مهم قال  ستاد شتكول اذا انصير اقليم يحمونة جماعتة ربعنة موو لو مومو ؟ جاوبتة اي همهة لعد انجيب ناس من المريخ قابل .جاوبني ايباخ عمي خليهة هل شكل احسن بلا فدرالية والطسات مالية الشوارع من انصير فدرالية شلون لازم الحفر بالشتة اتصير مسابح  واللغف يصير لخوت موزة ..بهل مناسبة التعيسة اريد اوضح انة اني كواحد من اشهر القندرجية على الطوبة الارضية  واكتب مقالات على الشبكة العنكبوتية انة الفدرالية نظام راقي وناجح بس بعد مامتوفرة الظروف لتطبيقة هسة بس بالنهاية يتطبق او اتمنة ان يطبق على اسس صحيحة في اقرب وقت .يعني مهما ايكون النظام متطور اذا العنصر البشري والضروف مامتوفرة يفشل هذا النظام وتكون نتيجتة سودة مصخمة يعني واحد ارهابي وتصير عندة معلومات بهندسة الاحياء اكيد ماراح يخترع اي دواء راح يصنع سلاح جرثومي والخيرات العراقية من تحكمو بيهة الازلام النتيجة معروفة للكل واكو بيت شعر قديم يوضح حالات مثل هاي الي نسولف عليهة .

بالنهاية اريد انصح بأنشاء صندوق دعم السياسين على غرار شبكة الحماية الاجتماعية يوفر المساعدة للسياسي يتولى مساعدة اي سياسي يعيش حالة الافلاس حتى لايضطر السياسي لمغامرات تجر الويلات على البلاد والسلام