• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : جاسمية تحرك كلب ابو جاسم : تخسر ما تخسر بالجير .
                          • الكاتب : مؤيد عبد الستار .

جاسمية تحرك كلب ابو جاسم : تخسر ما تخسر بالجير

مشهد تمثيلي
- يبين اليوم جاسمية ما عاجبج الوضع!
* يا وضع ... اشو الدنيا مكلوبة !
- هم كلبتيها .. شنو ..شصاير .. قابل مراكبج غركانة !
* مراكبي .. ها .. ليش مو صوتك الانتخابي ... اشو مغلس ؟
- كافي بسامير جاسمية .. عليمن مغلس .. هي شجم صندوك وشجم جهاز احتركن .
* لا بالله .. شجم صندوك .. اي .. هنيالها لامك .. مخازن المفوضية كلها احتركت.
- لا .. خبرني ( مجلوب السلف ) كال شجم صندوك واجهزة احتركن و مو مشكلة .
* هم اجينه على مجلوب السلف صويحبك .. مو خسر بالانتخابات بعد شنو لازك بالمفوضية .
- شمالج... يا جاسمية .. مجلوب يكول راح يصير الحساب من جديد وعلى الاكثر اله نصيب .
* يعني نعالك التسكام راح يصير مال وتستلمه راس الشهر .
- الله واكبر عليج .. ما تجوزين من النعال التسكام .. عمي بطلت ما اريد لا نعال ولا بشت .
* اذا ما تريد النعال ..جا ليش جايب لي بشارة مجلوب وتكول راح يصير له نصيب بالحسابات الجديدة .
- هسه انت اصبري علـيّه ....انطيني فـنـتـك .. تشوفين شلون راح اصير حماية لمجلوب من يصير نايب .
* ها .. هسة بينت النية الكشره .. مو بلاش .. رايح ويه مجلوب وجاي ويه مجلوب .
- يعني .. انت ما تفرحين من يصير النا ضلع بالحكومة .. اشتريلج عبايه وجرغد بريسم ..واخليج تمشين عالمودة .
* ليش يابه شفتني .. اني ابيع صوتي علمود جرغد بريسم .. والله لو ميت جرغد .. وحتى لو يصير الحساب
من جده وجديد للانتخابات صويحبك ما يطلع له سهم .
- فال الله ولا فالج .. انتي ليش عريضي بكل شي .. مجلوب هم صديجنا وهم من عشيرتنا .
* ما يفيدك هذا الحجي .. ماطوله ما يمشي عدل .. ويفرهد مال الله وعباده .. ما ينجح لا بالانتخابات ولا بالدنيا ولا بالاخرة .
- جاسمية .. بالدنيا افتهمنا .. لاجن بالاخرة شلون تحكمين على الرجال .. قابل انتي جايبه خبر من رب العالمين.
* لا .. لا خبر لا جفيه لا شربت .. صويحبك ما يربح لو تطلع نخله براسه .
- لا .. هضيمة يخسر ، واذا خسر احنا هم راح نخسر وياه .
* ابو جاسم .. لا تكول احنا .. كول انا اخسر نعال التسكام .
- هاي شلون طلابه .. ابتليت على عمري وخليتج تعرفين سري . آخ مني .. ما اجوز .. اعمه كلب .
* اكلك ابو جاسم سالفة صويحبك والخسارة مثل سالفة عبود الكرخي ومحمد الكبنجي .
- هاي السالفة شنو النوب .. اشوف كمتي تشمرين بعيد .. شجابج على عبود الكرخي ... صاير حجيج تكرزل .
* اي مو عبود الكرخي اتشارك ويه محمد الكنجي بتجارة الشعير ، اشتروا شعير وباعوه بخسارة .
- هاي شجابها على سالفة مجلوب والانتخابات .
* اي الها رباط لان عبود الكرخي كتب شعر وغناه الكبنجي ، يكول :
من كايلك تشري شعير / تخسر ما تخسر بالجير
شعيرك يخسر يا مصخم / قيمة نصه ما تلزم
انصحتك اترك لا تندم / لو مطرب لو تاجر صير
تخسر ما تخسر بالجير




  • المصدر : http://www.kitabat.info/subject.php?id=120599
  • تاريخ إضافة الموضوع : 2018 / 06 / 12
  • تاريخ الطباعة : 2024 / 03 / 28