|
الناس اشمالهم مثل المجانين
الواحد عا الاخو ايدور الزله
تركض عله الدنيه وعايفه الدين
باجر بالحشر ل الله اشتكله
الواحد بالجذب , بالقوه , باللين
المهم ايشيل اخوه, ويحل محله
ما شفنه صفو باعراكنه اثنين
ولا مسؤول بالحكمة تحله
واذا واحد وكع ما يلكه اليعين
كل اللي يشوفه ايكول , خله
بلد والشعب بي مقسوم قسمين
ناس ابوادي, ناس باعله تله
واحد بالعسل والثاني بالطين
احترنه ليا نفل نمشي ونكله
لتراب الوطن كلنه موالين
ليش اتكول هذه الجاي شله
اهل العدل مو عالكاع .. ميتين
وياهو التدك بابه ايكول , يالله
يبيعونه , ونرد للوطن شارين
وشريف البالمواطن كام ,هله
كفرلوكلنه ضعنه ابغربة اسنين
وبلدنه انريد نستانس ابظله
مو احنه عرب كلنه مسلمين
باجر يا عرب شنكول ل الله
مو احنه عرب واهل الدواوين
واهل نار ومضيف واهل دله
انكلبت ناسنه وصارت ثعابين
وبس اتحركه ,ينفث بيك غله
تاريخ .. ويكول العرب راق
اباة وللبشر جانو مظله
جان الزين عدنه من صدك زين
جميل اطباع , ما واحد يمله
اهل المستحه الجانو جثيرين
وياللاسف هذا اليوم قله
وصلنه بالعلم حد جاوز الصين
حد , بالكون ما واحد وصله
جنه اعله الخلك والكون عالين
وكل واحد اباخلاقه تعله
انكلبت سيدي اليوم الموازين
وزمان اليرفع الهامات , وله
وكوه اعله الزمن هاليوم باقين
لان سرنه صعب , محد يحله
خسرنه المعركة, وكل المحامين
كالو : ظل اله الكون , جله
حفر, واشواك درب البيه ماشين
طويل , وما اظن واحد يصل له
بالغربه صفينه والله اليعين
صحيح انعيش, بس عيشة مذله
بلدنه اتبره منه واحنه باقين
والشالت حملنه , غير مله
احنه اهل الشعر واهل الدواوين
اليسمعنه ابلدنه ايكول , بله
بلدنه ايكول انتم عدنه غالين
ومن نكبل , ايكول الضيف وله
بالاعلام يتسابق الطيبين
هله ابغيابنه وننطر الطله
حجي وبس والفخر للمد اليمين
ولليخلي العنب داخل السله
ذبايح صرنه للاخوه وقرابين
وخبر ينصاغ يوميه ابمجله
يحسدونه اعله امريكه المجانين
ما يدرون نبجي اعله المحله
وديرتنه التعج بالماي والطين
ما يدرونه انسميهه فله
حياة وبيهه للمجهول ماشين
وعمرنه بالتعاسه خلص كله
نخيت الله كولو وياي امين
ورسوله البالكلب ساكن محله
يبدل النه الطريق الشين بالزين
بحق كلمن توضه وكام صله
|
