• الموقع : كتابات في الميزان .
        • القسم الرئيسي : المقالات .
              • القسم الفرعي : المقالات .
                    • الموضوع : قصة الشعرة .. معي منذ 23 سنة . .
                          • الكاتب : ايليا امامي .

قصة الشعرة .. معي منذ 23 سنة .

 

 * كنت سنة 1997 طالب بالمتوسطة .. و أثناء الفرصة إجاني صديقي فلان .. شايل بيده نسخة من القرآن ويقول :
شوف هذا القرآن .. إفتح سورة البقرة تلگي شعره .. و روح دور كل القراعين تلكي شعره بسورة البقرة !!

سألته : وشلون عرفت موجودة بكل القراعين ؟

فقال : چا غير النبي ياي بالطيف لبنيه مريضه وگالها طلعي الشعره وخليها بالمي وتطيبين .. وإذا الناس ما صدگت .. الدليل على كلامي أكو شعره بكل القراعين .

سألته : وطابت لو لا ؟ صفن صاحبي وگال : شمدريني المهم كل قرآن أفتحه ألكه الشعرة .

قلت : أولاً .. إحنه متعودين كل سنة من يجي شهر رمضان .. نفتح المصحف ونظل نقره .. وكالعادة نوصل للنص وتخلص الروحانية .. يعني أكثر وأكبر سورة تفتحها الوادم وتقره هي البقرة .. وإذا محدب وتقره أسبوع بالبقرة وما تطيح منك شعره جا شنهي راسك ملبوخ بجص ؟

ثانياً : من تكلي الشعرة موجودة بسورة التوحيد مثلاً أگول شي غريب .. چا شمعنه يحطها بأكبر سورة بالقرآن ؟

ثالثاً : إذا نروح للسوگ ونشتري قرعان مسلفن بالنايلون ونفتحه .. أتحداك تلكي شعرة النبي .. إذا هي معجزة ليش بالقراعين المستخدمة بس ؟

رابعاً : أمس حصلتلك بسطه زينه بدرس الكيمياء .. وهسه دگ الجرس وعندك كيمياء .. روح للصف وطلع الشعرة للاستاذ .

المهم صاحبنا بدل الشعره السوده لگه صونده سوده بالصف .. ودگوه لمن صار سورة الـ ...

* زين إحنه بلد على المحك .. وعدنه ناس مهتمه بـ ..

السيد السيستاني يگول .. أشتروا ماش
أبو تربه يگول شفت المهدي وانطاني تربه
أبو كاروبه يگول كاروبتي زارها الحسين
أبو گدر يگول گدري طلعت بي صورة العباس

* لاشك أن الإيمان بالغيب صفة رائعة للانسان .. ولكنها لايجب أن تطغى على قوة المعرفة والاعتقاد والتفكير السليم .

* لا أريد التطويل هنا .. أكتفي بكلمة كنت ولا زلت أرددها ( عندما نرى صورة أهل البيت عند مليك مقتدر .. سنخجل من الحديث عن صورة في قدر أو قمر ) .




  • المصدر : http://www.kitabat.info/subject.php?id=140969
  • تاريخ إضافة الموضوع : 2020 / 01 / 19
  • تاريخ الطباعة : 2024 / 03 / 29