عبالي أرسِملِك لوحه
وغفيكي ع كِتاف الشمس
طرزلك من شِعري طرحه
ومن عمري فستان العرس
وقلبي لمخده لو بدك
بحشيها بريشات الغيم
وإغفى جوه اللوحه حَدك
ونسافر بعيون النوم
مابدي ريشه وألوان
عندي رموشي وموج اليم
بغُطا بقمحات الوجدان
تاتكمل سنبلة الرسم

بعرف شو بتحبي الأحمر
هيدا اللون ف بيت الحِلم
وان كان باب الحِلم مسكر
من عروقي بشحدلك دم
والأبيض بسمة ياسمين
غفياني عكبوش التم
والأخضر أرز وحنين
طفل بيرضع صدر الإم
وخبرية عشاق أتنين
حبّو بعضُن يوم بيوم
ولما افترقو عنبع العين
بكيت عين النبعه دم

عبالي أتحدى دافنشي
واسرُق منو هيدا الإسم
وفوت بقلب اللوحه وإمشي
وبوسِ شفافك جوه الحِلم
وما يمنعني عنك لون
ولا دمعه بعيون الهم
ولا طير من طيور الحزن
ولا حتى ناطور الغم
قولك فينا ولا ما فينا
نكزب كزبه بإسم الرسم
ونصدق ونقول نسينا
ونتخبى بفيات الحِلم