• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : اعترافات الملازم زكي /18 .
                          • الكاتب : راضي المترفي .

اعترافات الملازم زكي /18

 جلس جابر بعدما حددوا له مكان مع المخابرين وسلموه ( يطغ ) وبندقية وزمزمية ماء فأستحضر يوم السرية وامسها فأنحدرت دمعاته وبدا انينه يتعالى حتى بكى بكاء الثكالى والمفجوعين وتحلق حوله بعض الجنود وهم يحاولون مواساته وتصبيره لكنه كان يجهش بالبكاء واصبح كالنادبة يعدد اسماء السرية اسما اسما ويذكر مناقب كل واحد ويبكي عليه منفردا وتمنى لو ان هناك ناعية ترثيهم ليبكي عليهم بكل حواسه ومشاعره وكان صوته يعلو بالبكاء كل ما وصل ذكر زكي او جاسم او حوشي او احسان وتخلى المتحلقون حوله عن صمتهم في حضرة الموت واستذكار الراحلين فشاركوه البكاء . تكاثر بعدها الجنود حول جابر الذي بدى انهيار اعصابه وحزنه الشديد طاغيا لكل من يراه وقام احد الجنود فرتب الموضع للجلوس وحوله الى مكان اشبه بالعزاء واحضر سجائر وشاي واجلس جابر في مقدمة المجلس وطلب منه ان يتماسك كعادة صاحب المصاب وان يستقبل المعزين برجولة العراقي ويبكي براحته عندما يختلي بنفسه وحصل ذلك ظاهريا وتوافد اخرون ممن لهم اصدقاء من الراحلين في السرية الشهيدة ثم حضر ضابط الاستخبارات ودخل مجلس العزاء وقال كلمة تطرق بها الى حب الوطن والقائد وضرورة الدفاع عنهما واكد ان الشهداء سيدخلون الجنة وعوائلهم تنال الكثير من مكارم القائد وامر الجنود الحاضرين بالتفرق وارسال جابر الى خلفيات اللواء بالدريهمية الى حين تيسر ظرف يسمح بمنحه اجازة .

وصل جابر الدريهيمية وهو حزين فاقد الشهية للطعام ولم تكن له سلوى غير البكاء والتدخين وبوادر المرض والاصفرار تعلو وجهه ولم يجد في مكانه الجديد من يشاركه همه او يواسيه على مصابه بل وجد لامبالاة فضيعة من الاخرين وصلت حد الاستهزاء به من قبل البعض حتى قال له احدهم في بعض الجلسات : اخ جابر الا تعلم ان الحرب مستمرة منذ سنتين ونحن نخسر بها المئات يوميا من دون ان يكترث بهم العالم الاول والثاني والثالث وغيرهم من التسميات ولايفكر بمصيرنا لا الاقربون ولا الابعدون وان بقيت انت او انا او غيرنا على قيد الحياة فالمسألة مسألة وقت ياحبيبي لازم نموت والا كيف تستعر محارقهم .. كف عن البكاء حبيبي والله يرحم موتاك ووياهم وزكي هذا الخبصتنا بيه وجعلته القعقاع في شجاعته وابو ذر بأنسانيته واذا تريد تبكي عليهم اجلس لوحدك وابكي حتى الصباح .
وعرف جابر في طول الدريهيمة وعرضها بأسم جابر ( اسويج ) ورفع عنه القلم بالمعسكر الخلفي وبلغ رأس عرفاء الوحدة الجميع بأن جابر ( يسرح ويروح ) لا احد منكم له شغله بيه معفي من الواجب والتعداد والتدريب وحتى مامشمول بنظام الاجازات مفهوم وهذا كله بأمر الامر .
فقال احد الجنود ( يعني سفير فوق العاده ) .
فقال راس العرفاء : لا سفير ولاهم يحزنون ( رجال استوه ) شاف الموت بعيونه وعاش وياه وتالي عافه واخذ ربعه واصدقائه مو حقه اذا تسودن . معليكم بيه واذا سمعت واحد مأذيه اقدمه مذنب والا احصله عقوبه نشطه وداعة فاروق شعرة قلبي .ممنوع واحد يسخره او يغثه او يتقرب له المهم من يشتكي من واحد منكم ما يلوم الا نفسه . لما نشوف شيسوون له يودونه للشماعيه .. يكعدونه عند اهله .. يذبونه بالسجن .. تنزل عليه طركاعه من السما وتخلصنا منه ..هاي يمهم يبويه وماعلينا غير تنفيذ الاوامر ونعم سيدي واليخالف منكم العن والديه ..مفهوم
فقال جندي اخر : ياسبحان الله من كان عاقل ما فكرتوا تعاملونه بهذا الشكل لما جننتوه داريتوا مشاعره .. ما اعرف اشلون هسه نتخبل مثله حتى تدارونا والله ما ادري شنسوي .
فقال راس العرفاء : انلصم ولك ملعون الوالدين ثلاثة ايام واجب اضافي وتأخير وجبه ومن تتكلم اقدمك مذنب واشعل ابو الخلفك انت تدري هذا الجندي اشلون تخبل لو ماتدري .. بابا تخبل بالقادسية مو مثلك مكضيها بالخلفيات .
. ترك راس العرفاء المكان وتفرق الجنود ووصل جابر المكان متاخرا فسأل احدهم لماذا تفرقتم .؟
فقال الجندي ساخرا منه : اتحب اجمعلك اياهم تحكي معهم ؟
فرد جابر : أي والله بلكي عندهم اخبار عن سريتنا .. ما بين منها شيء .. ومقدم زكي اسير لو شهيد؟
.بابا انت ليش تسأل سرية شاركت بمعركة وادت واجبها والله يرحم الشهيد ويفك اسر الاسير ويشافي الجريح .
. أي مو هو هذا اللي اريد اتأكد منه حتى من اذكر اسم واحد منهم اعرف شكول مثلا المقدم زكي هسه انا مااعرف شكول عليه .. الله يرحمه .. الله يشافيه .. الله يجيبه بالسلامه وجاسم وحوشي واحسان والباقين هم لان كلهم اعزاز والله اعزاز .
.لاخاف البنفسج ؟
. شتكول
. اخي اكول القضية واضحة من تذكر المقدم زكي قول الله يرحمه والباقين نفس الشيء مفهوم ؟
. الله لايبارك بيك ليش كلهم الله يرحمهم ماتخاف من الله هذولا شباب وعندهم عوائل ينتظرونهم بيش تطلبهم .؟
. ولك بابا اني موديهم .. اموتهم .. اعرفهم .. الي عداوه وياهم .. انت سألتني وجاوبتك على روايتك الاولية التي نقلتها لنا .. بعد اني شعليه .
. شوف ابو تحرير .. لا لا انت مو ابو تحرير انت بالخلفيات شوف ابو خليل ترى اني نايب عريف مخابر جابر غنام ابن عرب وابد ما اخاف واذا سمعتك تكول عليه امخبل اسويها عشاير واخذ منك حشم وحتى الامر اخليه يعاقبك .
. لا عيني لا انت ابو العقل والمفهومية من يكول عليك مجنون ؟
. لا مو امس واحد منكم يمكن (انت ) امشي ويصيح وراي ( سويج .. سويج ) .
. لا لا لا هذا مو اني هذا جندي من غير وحده يمكن من النقليات .. تكرم سرسري وطردناه وبعد ما يدخل المعسكر واذا دخل نذبه بالسجن ونصيح لك عليه .
. عفيه ابو تحرير هسه انت خوش ولد .. اسولف لك قصة مقدم زكي ؟.
. لا رحم الله والديك شبعت منها وسطرتني بيها سطر من يوم الجابوك اهناه لهسه .
, ابو تحرير رحمه لابوك انت شسمك ووين اهلك .؟
. اني اسمي سعدي واهلي ببغداد وامي متزوجه ابوي اتحب بعد اضيف معلومات اخرى عني ؟
. زين انت وين رايح ليش ماتاخذني وياك للزبير .؟
. بابا يازبير اني رايح للواجب يمعود فك ياخه الله يخليك .
.لعد اني جوعان واريد جكاره حتى اقرأ الفاتحة ..تقراها وياي .؟
. علي ياهو نقرا الفاتحة اذا هي مسربه متفهمني رحمه لاهلك .؟
. نقراها عليك انت مو طالع للواجب .. انت شفتلك واحد راح للواجب ورجع .يالله خل نقرا على روحك بس بشرط اذا شفت احد من سريتنا هناك تسلملي عليهم .
. صار يالله ارفع ايدك وفضني .. الفاتحة .
. لاما اقراها هسه مووكته وايجوز ماتوصل تعال نقراها بالحانوت .
. طيب روح واجي وراك .
. مو تتاخر ترى انتظرك ومااقراها قبل لاتجي .
. الله وياك نايب عريف جابر سو...
. ضيف للنايب عريف كلمة ( مخابر ) ارجوك لان اني ستة اشهر دخلت دورة المخابرين السلكيين ما جبتها من الهوى مو مثل نواب عرفاء اخر زمان بليله ويوم يشد خيطين عبالك سالتهن من عصابة امه .
. صار تؤمر امر حضيرتي .
سار جابر متجولا بين الوحدات يجلس هنا ويجلس هناك حتى قادته قدماه الى سرية نقليه كان جنودها قد عرفوه وسمعوا منه موال سريته الشهيدة وامره البطل وتعاطفوا معه في باديء الامر لكنهم بالاخير تعاملوا معه على اساس انه مجنون واصبح اسمه ( ن- ع سويج ) وقرب الكراج صادفه ضابط برتبة نقيب ولم يؤدي جابر له التحية فاستشاط الضابط غضبا وأخذ يحاسبه ويشتمه وجابر يضحك مما يغيض الضابط اكثر والجنود يراقبون المشهد ويتمنون ان يكمل جابر الى النهاية لكن النقيب ازم الموقف مع جابر وقال له : لك انت نايب عريف وهتلر نايب عريف فما كان من جابر الا ان رد عليه وبهدوء وابتسامة الابله قائلا : لعد انت ماتستحي انت نقيب وعبد السلام جلود نقيب .؟ لم يتمالك الضابط اعصابه وضرب جابر بالعصا التي انكسرت على رأسه وسط ذهول الجنود فركضوا نحو الضابط لكي لايتمادى قي ضربه وصاحوا سيدي مريض .. سيدي مريض . فقال لك يامريض والله اعقل مني . فقالوا له ماذا فعلت ياجابر .؟ نظر جابر نحوهم ثم نحو النقيب وقال بهدوء : الله يرحم المقدم زكي فقد كان انسان ابن حلال من هو ملازم الى ان صار مقدم .
سحب احد الجنود جابر الى الحانوت وهناك اشترى له طعام وسجاير واعتذر منه ثم سار به نحو غرفة مضمد الوحدة الذي فحص رأسه واعطاه حبوب (براسيتول ) وقال يجب ارساله الى وحدة الميدان الطبية لان الضربة قوية الله لاينطيه عافيه الضربه ويمكن ترجع له عقله ويرجع يتعذب من جديد .. لازم نسويله عيادة على السريع .
. زين اذا سألوا بوحدة الميدان عن الضربة وسببها .؟
.يعني تقصد لازم نخبر الامر مو خاف تصير مشكله وهو من غير وحدة .؟.
. بابا يامشكله ضباط يسوون مشكله على حساب جندي لاتصدق يفضونها بيناتهم ببساطة حتى اذا مات الف جندي .. طيب شتريد تخلي سبب للضربه تقول وقع من البدي يشكلون عليك انت مجلس تحقيقي ويصيرون شرفاء براسك أي عذر يرجع عليك وتتعاقب انت او أي واحد يتقرب للقضيه .. معليك روح خبر ريس عرفاء وهو يتصرف .
. طيب اكتب ورقة اوديها له .
. اخي اني شنو علاقتي .. روح اخوي روح ورانا شغل الله يخليك .
. جابر امشي خل اوديك الوحدة ميدان بلكي يسوون لراسك جاره .
. اخوي شيسوون لراسي وهو خرب من زمان .
. أي شبيدي عليك ياعيني هسه لو الروس تتجفت مثل المحركات كان وديتك للمفرزة واشتغلت عليك الاسباين والدرنفيسات وماتطلع من الكراج الا وانت نكره سلف لكن انت الفيتر مالك يمكن حتى مو بالشماعيه لان البساتم مال راسك كلهن رافسات يعني كص وذب بالشط وانوب منين يجيبون لك راس ومامتوفر عندهم غير ايدين ورجلين صناعيه , والله يابه حيره مااعرف شسوي .
. زين وديني للضابط الالي مالكم بلكي عنده بالمستودع راس مستلمها من الاعاشه ومو مهم جديد مستعمل بس كون وايراته تشتغل وهذني المااعرف شسميتهم رافسات حتى ارجع للساتر واشوف منهو رجع من سريتنا وحتى اذا راجع مقدم زكي هم اسلم عليه وهم يوقع لي اجازتي .
. تمام كلامك مضبوط امشي ويصير خير.
. عمي ياخير والله ماكو بها البلد غير الحرب والموت والسويجات وحتى وحدة الميدان الطبية هم كلهم سويجات .ليش هو اكو واحد صاحي بالعراق .؟




  • المصدر : http://www.kitabat.info/subject.php?id=168894
  • تاريخ إضافة الموضوع : 2022 / 05 / 22
  • تاريخ الطباعة : 2022 / 08 / 16