باريتك أيّام القحط والخبزه چانت قرضه *** وچان السعي بذاك الوكت طير ويمرله بعرضه
راح اكشف الماينكشف ترضى بعد ماترضى
وتخيّطت موگدي ***** ورجع وگول اتعدي
مطلوبلي اسـنين السـهـر واليوم تنكر دَيني
يالچنت تارس عيني
****************
چنت امنريد اتفگّدك مثل المضيّع بالبر **** من وكت فرغت جربتي مايي اعلى ماكو اطّشّر
بتموز وبعـزّ الظهر تيبـس لهـاتي امنالحـر
ونطيك كل ماعندي *** تاليها توگف ضدّي
يالمايك امنصله نشف عاد اشوكت ترويني
يالچنت تارس عيني
*****************
خلّيتني انتقدك صدگ وحچي السوالف كلها ******* وتمگمش الماتنعرف وندل الماتندلها
وآنه المفرزن بذرتك وبطينتك شــاتلها
صاير تمر متعدّي *** يالچنت تمشي ابسدّي
حچي المخلبص والچذب تدري انته مايعنيني
يالچنت تارس عيني
*****************
صايرلك اكثر من وجه يالچنت ساسك خاوي * گالوها أهل المعرفه نص ارنب ونص واوي
موطيبه البطبعك گبل بـس ماگـدرت اتلاوي
وهسّاع صاير حدّي * يالصنگرك من بردي
تحـترگ من چـيلة غـفل ودّخّـن وتعـمـيني
يالچنت تارس عيني
*****************
أسنين عمري اتلولحن واتذكّر الودْ كلّه ** وعرف الصارت موش اهي وعرف امنين الخلّه
كون العنب كلّه دغـش شــلّي بعد بالســلّه
يالسدّا عرجك عندي ** ودّي أبز عينك ودّي
راحن اهروشـك صوفرن ماضن بعد توفيني
يالچنت تارس عيني
******************
چنت احفظ أيّامك درخ طالب يحب ادروسه *** وتاليها شفتك تستحق أنزل بگاعك دوسه
وشما أهوّس ونفعل أربطها بيك الهوسه
مكتوب كلّك عندي *** يالماحظيت بودّي
يالمابعد تسوى العتب ملِّتك باجي اسنيني
يالچنت تارس عيني
*****************
28-5-2013 |