أول مرة يسمع خريبط فيها بإسم الموازنة حين اصطدم وجهه المغبرّ بوجه مدير شعبة حسابات دائرته،وجه مدير الحسابات "ماتكَصّه السجّينة!"،بينما وجه خريبط يتراقص مثل فيفي عبدو،صادف ان وزير الـ..... قرر استخدام جميع صلاحياته بتكريم المواطن خريبط بمبلغ 500 الف دينار وهو اعلى رقم يمكن ان تصل اليه صلاحية الوزير في عطائه الحكومي.

حمل خريبط كتاب تكريمة ووقف ذليلا امام باب شعبة الحسابات،فكّر بينه وبين نفسه: 

-ابو الخرابيط اليوم عال العال،الوزير راضي والمدير العام كَاضي وبقت الساحة إلك بعد رويحتي ...خلا لك الجوُّ فبيضي وأصفري....نص مليون ابو الخرّيط اليوم يترسن جيبك...اليوم اخلي حاتم الطائي يضم وجهه واني اصيح وراه:إشررررررررررررررررردْ!!،الجهال اليوم راح كل واحد اجيب له هدية خاطر يعوفون امهم اليوم....زين المرة شتجيبلهه ابو الخرابيط؟ عمي خل اشتري هدية لروحي لان اعرف الفلوس بس تحط على ايدهه تطير!....خريبط ترتسم على محيّأه ابتسامة خبيثة![انهجم بيتك اخريبط انته تعرف معنى الابتسامة خاطر تعرف الخبيثة!؟...اليوم اجيب الهه سيت ملابس نوم اخضر طوخ خاطر اليوم .أنـ...ـــام!! على المنطقة الخضراء كلهه....بس لزمن ولابد اجيب الهه من هاي اللبسان ابو الخيط...عمي غير نمشي ويه الحداثة "كَبل ننزع شي ندوّر علي شي هسه نفتح شي ندوّر على شي!!"،وطبعا ابو الخرّيط اليوم تجيك حمدية مهلوسة هلس وتغني لك: تعال جنبي تعال جنبي...اي غير شايل نص مليون دينار مكافأة من السيد الوزير؟! بوية منو محصّلهه...انوب من ارتاح اصيّح عليهه:

- اريد شاي....اريد شاي...اريد شاي!!

خريبط وهو ممسك بالورقة بدا هذيانه مبكراً،كان يصيح: اريد شاي...اريد شاي وهو يتصور انه يخاطب حمدية في فراشه بعد ان تركته ليلاً...

جاوبه صوت من اقصى غرفة الحسابات،صوت مخنوق اشبه بصوت رفيق في الجيش الشعبي:

- ليش مانجيب لك نسكافيه؟

انتبه الى ان مدير الحسابات هو من يسأله:

- لا استاذ والله دايخ وعبالي حمدية...ياحمدية اني شبيّه...العفو استاذ هاية مكافأة وتكريم من السيد الوزير ومن ايدك تطلع حلوة.

لبس نظارته النص التي لاتصل الى اذنيه بعد تأثره بنظارة بهاء الاعرجي الطبية،وقال له:

- روح تعال بعد شهر!!

-بروح ابوك ليش؟مو هذا امر وزير!؟

-واذا امر وزير...هسه الصرف متوقف حتى يصوّتون بالبرلمان على الموازنة!

- زين استاذ واذا ماصوّتوا على الموزانة امسح ايدي بالحايط؟

- اني انطيك الحل:روح لعلي حاتم السليمان واصرف لك مية الف كراوي واقنعه بحالتك،ومناك بلكي تشوف وزير المالية خاطر يقنع العراقية بالتوقيع،ومناك هم اصرف 200 الف بكردستان خاطر تقنع كاكه برزاني خاطر يقنع التحالف الكردستاني يوقع،وانوب ارجع لبغداد واصرف 100 الف دينار وروح للجعفري خاطر يقنع التحالف الوطني بالتوقيع،وبعد ماتقنعهم كلهم روح خلي خضير الخزاعي بالرئاسة يوافق عليهه ومن تنّشر بالجريدة الرسمية تعال اصرف لك الخمسمية!!

فتح خريبط فمه بدهشة وهو يقول:

-يعني اليوم.... لا المنطقة الخضراء ولا لباس ابو الخيط؟!!