"ح.م" وجه عشائري معروف في المنطقة وهو صديقي ، اكبر طلاّبة عشائرية يفضّها الحجي في نصف ساعة لانه فريضة لايسكن في اليونان ويجمع العشائر في الناصرية مثل الخشلوك، حين أقابله أشعر بحنين العراق على شفتيه وشاربه الكث الى الحد الذي أشعر أنه سوف يبكي وهو يقول:

-خوية...إشلونك؟

ثلاثة أشهر إفتقدت وجهه الطيب، تساءلت هل سافر إلى جورجيا أسوة بالسياسيين العراقيين هناك، سرسرية ....ماعدكم شغل وعمل عايفين نسوانكم ودايحين على نسوان البلدان الاشتراكية؟ يعني شفتوهن حلوات ومربربات وفقيرات وانتو مضبضبين بالدولارات؟..قبل يومين شاهدته، وجهه شاحب قليلا...كيف يمكن لك أن ترى شحوب وجه نصفه شوارب سود والنصف الاخرى مغطى بالشطفة التي لم تفارق الاسود والابيض والأحمر...

- هاخوية حجي شلونك؟ وين هالغيبة والله عبالي بجورجيا مثل أحباب المضيف!

ابتسم بحزن شديد ولمحت دمعة ترقرقت بعينيه الجاحظتين مثل عتوي خرج للتو من معركة خاسرة لحقت به بعد أن أصابته ثليثية برأسه :

-خوية ياجورجيا ...اخوك صادوني وآني النجر!.

تيقنت انه يريد ان يفضفض لي همه الشخصي، اظن ان السر الذي يخفيه مثل جبل، حتى اني تذكرت قول الجواهري: [انا عندي من الأسى جبلُ....يتمشى معي وينتقلُ]، وتذكرت حين قلت للمرحوم الدكتور محمد حسين الاعرجي: ان الجواهري اخذها من اغنية الهدل لياس خضر حين يقول: امنين اجيب ازرار للزيجه هدل وشلون يتزرر صدر شايل جبل، حينها شتمني وضحك وقال: انت الوحيد الذي يعرف ان الجواهري كان معجبا بياس خضر ويستمع لاغانيه وقال هل تذكر بيته: [بأبي انتِ، لاأبي لك كفؤٌ ولا أنا!]، قال اخذها من [ يعنيّد ييابه...تسوه هلي وكل الكَرابة...]، نعود الى الشيخ عنيّد صاحبنه:

-سلامات شيخنه!!

-عمي ياشيخ يابطّيخ...أخوك صرت نصبة...اتعرفت على وحدة صاكّة..مبرومة برم وفوكَاهه تحب المشورب...وآنه أخوك شوفهن شواربي كَدامك ضبّه...كَضّيت وياهه شهرين مااشوف غيرهه، تتمقلج عليّ براحتهه...واخوك تدري نفسه دنيّه ويه النسوان...خوية اني وين شايف نسوان؟ مرتي رجليهه جنهه محراث مال تنّور...وبليلة ظلمة جنت وحدي ووياهه على الماسنجر قالت لي: 

-حبيبي انزع البشت...نزعته اخوك...جاشبيّه مااعرف انزع؟! انزع الشطفة انزع العقال..اخوك شمرتهن...انزع الدشداشة حبيبي...يمكن شكَيت الدشداشة وسردتهه بالنص!!..كَالت هذا شنو لابس؟ كَلت الهه قاط فانيل...اشتعلت روح ابو الفانيل..اريد بس ألحّكَـ على روحي..انزع الفانيلة...نزعتهه..قالت: اووووف شكَد احب شعر صدرك هذا يمثّل لي الفحولة بحذافيرهه..من صدكَـ اني كيّفت على الحذافير هاي!!...واخوك عندي فحولة مال ثور...انوب قالت لي انزع لباسك ...باوعت يمنه...باوعت يسره...محد يمي ...اخوك صرت عبالك قرد...نزعت تقول ماشايف مرة كَدامي..واني أكَول هسه تطلع صورتهه وتنزع كّدامي....

-اي ...وبعدين؟

- خوية وره مااتصلخت كَدام الكاميرا... دزت لي رسالة خوية طلعت مو... مرة...طلعت زلمة...طلعت واحد مشورب يضحك عليّ وقال لي اذا ماتدز لي الفين دولار انزل الفيلم على اليوتيوب وافضحك بقلاقيلك بين عشيرتك...

-اي وشسويت...؟

- خوية كسرت الكومبيوتر وشردت من البيت!!.

--------------

نسخة منه الى....../ ديرو بالكم لاتتصلخون مو فضحتونه والله’!.