حشدك هذا حشدك وانته سويته

                 وتحت راية علي ابفتواك لميته

لوما سمع صوتك ماركض للموت

                    ولا طلگ الدنيه اولا ترك بيته

ماچن مرجعه چن شاف بيك حسين

               اومثل عابس مسودن بيك خليته

الزفة عرس چنك رايح امودٌيه

                      ماچنك الساحة موت وديته

دگ بيده اعله صدره اوركض لمٌن شاف

                           صدرك للعراقيات دگیته

 

وطن قدٌو قميصه اونهبو اشما بيه

               اولجله اگراب سيفك رحت قدٌيته

نعم ساكت چنت عن حكمه مو عن خوف

                    لاچن من حچیت الکون هزیته

تره اللامك گبل عالصبر ضل ندمان

                          وابدم الدمع مولاي بچیته

علمته الزلم مو عالسراب اتطوف

                    اوموقف من علي الكرار راويته

السيف ابساعته موكل وكت ينراد

                 وجه وكته اورحت للسيف سليته

 

عد عيناك گلٌك والتريده ايصير

                   اوحشدك رفع راسك من تنخيته

وحگ اعمامتك يامرجع التقليد

            وحگ کل فرض قمته اوفرض صليته

وحگ غيرة علي ال بالدم تدور وياك

                    وحگ عطر النبوٌه البيك شميته

يبومحمد رضا اومن حكم حد السيف

                         سيفك للجهاد وياك وضٌيته

والرد الشمس ماچان رد مكسور

                           لوما داعش ابفتواك رديته

 

الك عرفان واجب يوگف التاریخ

                   البيدك بأحرف امن النور خطيته

كل فاسد كشفته اوداعشي ابفتواك

                       واليلعب على الحبلين عرٌيته

اويسيد فتوتك صارت سفينة نوح

                 اومن طوفان داعش وطن نجيته

الأمس شمرت الشيله اعله السياسيين

                  اوطاح احجابها اوماطاح ياريته

همٌه اگبالها اومحٌد تنخٌه اوگام

                        وصاحلها الردن لعداچ کفٌيته

وانته امن النجف والغيره صعدت بيك

              او ركضت الراسها او بالفتوه غطيته