الرجال تولد من رحم المعاناة .. وقفة مع اضراب الطلبة عن الدوام
مصطفى جبار سند

المقالات لا تُعبر عن وجهة نظر الموقع، وإنما تعبر عن رأي الكاتب.

شبعت طين وزلگ بسوگ القسم من چنت اروح للمدرسة انا و علي خشان ، بس محد صورنا
اما بالاول ابتدائي، فما اعرف شنو رحلة، لان چنا نبسط بالگاع
كذلك اشكر كادر مدرسة المصير الواحد بالحيانية لان علمونا نصنع طباشير، من كانت المدرسة بدون طباشير.
تخيلوا بالبرد وماكو جام بالشبابيك، بحيث مرة گعدت بصف الشباك، فوگ البرد انفشخت بعرنوص تايه
وراها من ورة الفشخة مالتي صدروا قرار المدرسة كل طالب يجيب گونية يدگها على الشباك
واحلى شي كنا نغير الملابس بطريقتين : اما تگلب القميص والبنطلون اذا تغير لونة، او نصغر ملابس أبوي ( الله يرحمه ) .
ومن عدمت الدولة الوالد، ما اسولفلكم على التكاتف والألفة، الحمد لله محد ظل يگعد يمنه اني واخوي و ولد عمتي، بس المخلص Arkan Hashim .
بس امي ما يوم گالت لا تداومون، ولا گالت هذا مو وطنكم الي عدم ابوكم خيمتكم وحاول يذلكم .
انتهى المشوار ، بكلوريوس عدد ٢ ، وحدة هندسة والثانية اقتصاد ومرتبة اولى ع جامعة 
انتهى المشوار بنجاحات، الله وبعض الخاصة يعرفونها، بدون مساعدة جاه ورثناه من عائلة او زعيم، بدون مساعدة اموال او سلطة ، بدون مساعدة حزب، بالعكس كسرت مجاذيفنا الاحزاب وبعضها حاربنا ، اقدر بعض الناس ما يتحمل نجاحنا، وانطيهم العذر، لكن نصيحتي، الرجال تولد من رحم المعاناة ، ونصيحتي الخالصة واكون مذنب اذا ما حچيتها، ارجعوا للدوام يا اولاد ، يردون العراق يبقى متخلف، ومنو يضمن غداً افضل من اليوم، ربما المندسين يتسللون الى عرش التربية والتعليم بعد تضحية بسنة كاملة من ترك الدراسة، عاقبوا الفاسدين بعنادكم واصراركم، وشقوا طريقكم بالقطاع الخاص اذا انغلق باب القطاع العام، شكراً للمتظاهرين السلميين والداعمين للعلم والتعليم .

الموضوع السابق انتفاضة أبي ذر الغفاري ، قصتها وفلسفتها

قناتنا على التلغرام : https://t.me/kitabat