وين اهاجر
قحطان الحسناوي

وين اهاجر
ما اهاجر
انه سمجة بحر مالح
وماي اوربا حلو وشلون اسافر
انه خاجية بخيت
تشيلني امتون الشيوخ بكل مفاخر
وخاف اوربا تذلني
خاف اصير اهناك مسحك للقنادر
انه نكطت مستحه
وما اليه امجان بجباه العواهر
انه مو بسطيه للذل
انه مسجد للكرامه ابيتي صاير
ما اهاجر
ما اعوف اعبايه اختي
بغير حارس صعبه تنعاف الحراير
انه عصريت خميس
بيها ريحة كربله وذيج المناير
وهالمناير
وين بأوربه مثلها
ﻻ برج ايفل وﻻ كل صرح نادر
وﻻ تكلي الفاتيكان
مو مثل طف كربله يجبر خواطر
ما اهاجر
وبنتي مو خايف عليها
اتربي باجر جيل متربي اظافر
وابني يشبهني اريده
خاف اتيه بينه وبين اخته باجر
ما اهاجر
مثل ما هاجر كبل بعض العناصر
الواحد وتسعين عافوا
كل مناره وكل ضريح بﻻ مناصر
ويوم طاح الصنم هجموا
عالكراسي وعالنفط مثل الكواسر
ما اروح وتالي ارجع
ابقاط ايطالي وعطر باريسي فاخر
واعلن بﻻ مستحه وبكل وقاحه
انه ثائر...انه ثائر
انه باقي بندقيه
على جتاف الزلم متروسه شواجر
نه باقي ما اهاجر
انه باقي وايدي تربه
تسجد البوسات فوكاها واكابر
انه ايدي ايد فا س
تحمل السيف وتقاتل عالسواتر
انه يدي اتشيل رايه
مو نبيذ وفاكهه ليهودي غادر ما أكولن ايد مرسل
بكل فخر ايدي اكولن ايد شاعر
ما امدها لليذلها
ما امدها .. ما اهاجر
وين اهاجر .. ما اهاجر
 

الموضوع السابق سَجّلها يالتاريخ

قناتنا على التلغرام : https://t.me/kitabat