• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : كلُ قَلبٍ كـَـربلاء .
                          • الكاتب : سعدون التميمي .

كلُ قَلبٍ كـَـربلاء

تطلبني عمر أكتب شعر وأرثيك
وتطلبني دمع كد عمري حتى أبجيك
 
يادمعة رفض شكت جفون الليل
يامنبر يلمك حتى أريد أنعيك
 
ردت ابجيك
لكيتك باب جنة وروحي طفلة خوف
تلوذ بمستحاها لو يمر طاريك
 
نسد يادين تطلبنه بستر كل العراقيات
إمنين نجيب ذمة التكدر توفيك
 
يانحر التحدي الرجف الطغيان
يحسين الرسول الجان يفخر بيك
 
رغم وحشة الطريق وقلة الأنصار
وجفوف الحقد ماكدرت تلاويك
 
أخجل من أذكرك يابوالأحرار
يادرب التحدي آلاف سارت بيك
 
حسين يزت حسين وكل كلب ميمون
وتتعنه الزلم وتريد بس ترضيك
 
أكثر من ألف عام أنت بينه تعيش
صوت بنص ضمير الأمة ضل يفتر
 
نشوفك بالصواني بخبزة العباس
بدموع الثكالة ولوعة الخدر
 
وتمرالفاجعة وتتجدد بكل حين
وإسمك بالدمه بكل ثورة يتسطر
 
ومن نتذكر إسمك يصهل الميمون
وبس يقرأ القارئ ينزف المنبر
 
ونشوف المشرعة والخيم والأنصار
وأبوفاضل يرد إردود يتكنطر
 
يالمعلم الزلم تتجاسر أعله الموت
ويالمخلي الجروح تكطع الخنجر
 
ويالمعلم الركاب تعاند السياف
ويالمعلم الجثث بالشدة تتوذر
 
ويالمأسس إسلام بعكس الإستسلام
ويالمعلم العبيد شلون تتحرر
 
أكتبت أول رسالة بفقه الإستشهاد
نحرك قلم صار وكربله الدفتر
 
رادك الله تصبح كعبة للأحرار
وبدمك كتاب الله يتفسر
 
وجنت تريد قله وخيرة الأنصار
وأبد ميصير طف لنصار لو تكثر
 
صلاة الخوف ماخايف جنت هيهات
جنت خايف صلاتك خاف تتأخر
 
شمرت دم الرضيع ومانزل للكاع
نزل فوك السبايه يظلل إمن الحر
 
وإسمك لو يمر ينخطف لون إعداك
وحتى السيف منك وجها صار أصفر
 
صرت مصدر قلق لأمريكا وإسرائيل
بحبال الغضب يحسين جرهم جر
 
دمك قنبلة وصاعقها عاشوراء
وبيوم الطبك بالدمعة تتفجر
 
ياأعذب تطرف يتجه لله
هنياله التطرف بيك وتأثر
 
حتى الماله دين ومايعرف الله
أخذ منك رمز للثورة والمصدر
 
موقامة التطبر روس اليحبوك
القامة براس كل حسين تتطبر
 
نحبك ياحسين بكثر ميبغوك
يامفتاح جنة وامك الكوثر
 
نتعناك رغم القتل والتفجير
ونحس زفة عرس لوردنه نتفجر
 
قضية الرمح مو جانت يزيد يريد
ربك رادها بهالصورة تتصور
 
المسافة البينك وبين الله هالمترين
بس طول الرمح ماتنحسب أكثر
 
تزنجر كل سيوف الحقد ياولاي
وسيفك ضاك دم وأبد مازنجر

كافة التعليقات (عدد : 2)


• (1) - كتب : سعدون التميمي ، في 2011/12/18 .

الاخ العزيز فائق الربيعي شكراً جزيلاً لك وسلمت ياسيدي العزيز على روعة تواجدك وتعليقك الاكثر جمالاً
محبتي لسموك ودمت بخير ان شاء الله تعالى

• (2) - كتب : فائق الربيعي ، في 2011/12/18 .

اخي الشاعر سعدون التميمي

قصيدة مذهلة ومبهرة بصورها الشعرية وبمعانيها
سلمت شاعرا كبيرا مع التحية والتقدير



  • المصدر : http://www.kitabat.info/subject.php?id=12225
  • تاريخ إضافة الموضوع : 2011 / 12 / 18
  • تاريخ الطباعة : 2022 / 08 / 12