• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : مكاتيب .
                          • الكاتب : سعدون التميمي .

مكاتيب

 إجه وكت الوداع إوادعتها

ومشيت ومهرتي بخدودي دمعي
أمي الودعتني بطاسة الماي
يمرها الليل بس تذكرني تنعي
عشت إبين ربعي مدلل هواي
وهضيمة بالأسر إختلف وضعي
على ظهري بعدهي آثار السياط
وحسرات العذاب الكلت ضلعي
أنه عن كل بشر أختلف والله
عراقي آنه الكرم والجود طبعي
من شفنه العطش مر بالسواتر
إجوا صوب المنية ركاض ربعي
وشفت بكل جرح مرسومة بغداد
وعرفت الشدة هذه وهسه نفعي
بيمنتي بندقيتي وشلت العراق
مابين الزناد وبين إصعبي
من ناده الوطن لبينه دعواه
متأخرنه عنه وكلنه باجر
كعدنه الضمير النايم سنين
وصرنه للوطن سبحة ضماير
الوطن بعيونه نغفه زغار وكبار
الوطن دله ومضيف وبيت عامر
خفت رايتنه تبقى بليه عباس
وخفت يبقى الوطن يكسر الخاطر
بقه بس النطاق وحاربت بيه
وقبل لاأنأسر دنك الساتر
أنه بيوم تأسرت دم بجت بغداد
لأن  إحساسها إحساس شاعر
وعصافير الوداع  إبيتي تدور
ومرواح الهجر مر بالبيادر
رجعت وضهري محني وحيلي متعوب
وأبيض راسي شيبته المحاجر
رحنه زغار بس ردينه شياب
واحدنه وجه تابوت صاير
رادوا بس لجوئي وطخت الراس
وفروا بيه أنواع المخافر
والمسافة البين بيتي وبين طهران
عشر سنين ذلة وكسر خاطر
إرجعت من بعد عشر سنين ذلة
ولكيت أهلي على طول المكابر
وأعز مابيهم أمي شمعة الدار
عونه البالوداع إوياها حاضر
خسرت أمي وربيع أيامي الفات
وشأكثر بعد من هاي الخساير
عالمرصد عميت عيوني بالفاو
وأحلامي أنتهت فوك السواتر
عكب حضنج صليل وبرد بعضاي
عكب حضنج ذليل أكسر الخاطر
أمي وياحسنها حسن بغداد
ومثل طعم الدموع بيوم عاشر
بعد دمعاتج بخد المكاتيب
وحسراتج ملت حلك الدفاتر
وكذلتج هالبعدهي تغازل الريح
وفرات ودجلة صارلج ضفاير
أمي وياخلكها خلك تنور
رضعتني عشك للوطن طاهر
صحيح الأسر ذلة ويذبح الروح
وخناجرهم بظهري وكوه أكابر
بس يايمه والله الصبر من فاض
لويناهن لوي خشوم الخناجر
 
البصرة 2000 للميلاد



  • المصدر : http://www.kitabat.info/subject.php?id=12231
  • تاريخ إضافة الموضوع : 2011 / 12 / 19
  • تاريخ الطباعة : 2022 / 08 / 10