• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : جثة احلامي .
                          • الكاتب : سعدون التميمي .

جثة احلامي

يبو كَصايب ذهب والخلك جرفين
دخيلك ياوطن من حبك دخيل

ندم آدم ندمنه بيوم عفناك
وبالغربة ندفن مليون هابيل

عفناك بوكت بي صعبة تنعاف
ويمرحزنك علينه بهدوة الليل

عراق شكَد سمح ويه اليعيلون
وأنت المارضيت بناسك تعيل

صبر أيوب صبرك عالملمات
وجلد عالموزمات وخلكَـك طويل

كلش تختلف عن غيرك هواي
حتى دموعك بخدك قناديل

وحتى الحزن بيك نشوفه ضحكات
وجوادر حزنك بروحي شناشيل

قبل لاتنولد أنت إسمك إعراق
وقبل لانعقل بحبك مخابيل

عراقيين كلش من الكَماط
وسمار خدودنه بلون المواويل

بعدني إشتاق إلك رغم المسافات
ودمعتي شما أذكرك نهر وتسيل

بجينه بفركَتك حد شهكَت الموت
وهذن دموعنه بخد المراسيل

وطن غيرك أبد ماتقره العيون
نقراهن وِطن وبليه تأويل

بس إسمك بقى وسط الجوازات
وبس إلخاطرك تنزل دمعتي

عبرت أول جرح عنوانه الحدود
وعبرت وعبرت بصدري عبرتي

ومشيت ونار ذلة تحز بالجدام
وشلت جثة أحلامي بنص جنطتي

نطيتك ظهري من عبرت الحدود
وصبح وجهي ظهر والله بغربتي

أفكر بيك وأصفن خاطر أنساك
وأرد إردود وألكَاك بصفنتي

وأحركَـــ  ذكرياتي بنار الأشواكَـ
وأحس نار الهجر تلب مهجتي

باجر على بابك أركع إرد
ومن ترابك تعفر جبهتي

عراق شلون عدنه كَلوب تنساك
ونحاول ياوطن نجرح حساسك

وأنت المكسرت خاطرنه فد يوم
والكلمن عطش مديت طاسك

ياحنة الفاو ودفو المشخاب
شمعتك دم بجت من ذبل ياسك

صبغنه أرواحنه بلون الدللول
وشربنه المرجلة إمن شفاه كاسك

خجل ثوب الكرامة من اليلبسون
وبس أنت أعله كَدك وبقياسك

ورغم صغر الخريطة البين الحدود
بس تبقه الجبير بعين ناسك

بيك أنت هبطك آدم وجبريل
وأحنه بدم علي شيدنه ساسك

ياأطهر وطن ياأطهر تراب
بيك حسين طاح ونحره باسك

عراق أنت وأبد مادنكَت يوم
لأن كَبة علي خوذة أعله راسك


سعدون التميمي
 




  • المصدر : http://www.kitabat.info/subject.php?id=14935
  • تاريخ إضافة الموضوع : 2012 / 03 / 09
  • تاريخ الطباعة : 2022 / 08 / 19