• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : شكوى الى امير المؤمنين (ع) .
                          • الكاتب : سعدون التميمي .

شكوى الى امير المؤمنين (ع)

يحيدر اشتكيلك عظم بلواي .. بعدك يبو اليمه العدل مفقود
مابين الحكومة وبين الاحزاب .. انتسله بالتمني وكلمة العود
وكَبل صدام واحد حارب الدين .. وهسه بكل حزب صدام موجود
ماشفنه الترافة والعدل ضاع .. وياحاكم يجي لهالوطن نمرود
سفينة احنا صفينه بغير ربان .. وياهو الي تقدم رايد يقود
ماغيرنا كل شي نفس الاوضاع .. نفس العصة والجلاد موجود
ونفس الغابة عشنه ونفس الاسلوب .. المرؤس الاسد والتحكم قرود
نحلم بالامان وراحة البال .. وباب الفرح ظل للتالي مسدود
شجم عيد اليمر والوطن مهضوم .. ونعيد بالحزن وبدمع الخدود
شفنه من العذاب اشكال والوان .. ونتأمل يجون البيهم الزود
ووعود ياكل وعد باجر يرجعون .. وكَـلب الشيعة ظل عالباب مشدود
سجون ومشنقة وتعذيب واعدام .. ونحس دمنه نزف من حز القيود
ويمر صوت اليتامة بهدوة الليل .. ونعاوي ام الشهيد تبجي الحدود
الوطن قدم زلم خيرة الشبان .. تشهدله المقابر قدم حيود
وهمه ولاعبالك ولد هالكَـاع .. اولا واحدهم اعله الشعب معدود
مو وكت النفاها نريدكم كون .. بالايام التعدن عالوطن سود
من جان اليسولف بيهم يضيع .. ويطب جوه وبعد مايرجع اردود
مو هسه اجو بس بالشعارات .. وبحجي الجذب وبكثر الوعود
حرية فقط بس عالحياطين .. لكن بالحقيقة وجوهم سود
تشوف جفوف اديهم ناعمه شلون .. انعم من وجه بنت الولاية
بيهم دورت ماشفت الحسين .. ومنهم ايست حد النهاية
كل واحد اشوفه اعدال شمرين .. وشيعتنا اصبحت هي السباية
من اجل الكراسي ونهب الاموال .. وارضاء الغرب عدهم الغاية
ماغيرنا كل شي بس الهدوم .. نفس حزب البعث بس بلحاية
يتغنون بجرحنا ودمع العيون .. وكراسيهم على اجساد الضحايا
ونظل نشرب جرحنا ومانطخ راس .. ونميز اعدائنا وسوء النوايه
وعلى درب الشهادة نسير للموت .. دم الحسين خط النه البداية
البصرة 2005



  • المصدر : http://www.kitabat.info/subject.php?id=34650
  • تاريخ إضافة الموضوع : 2013 / 08 / 07
  • تاريخ الطباعة : 2022 / 08 / 16