• الموقع : كتابات في الميزان .
        • القسم الرئيسي : ثقافات .
              • القسم الفرعي : ثقافات .
                    • الموضوع : النشيد العاطفي .
                          • الكاتب : سعدون التميمي .

النشيد العاطفي


بسمك سولفت حتى العصافير
ونشيد إسمك صبح بحلوك الزغار
إشتهتك روحي يابو شفايف التين
ويالدورة ركبتك جنها جمار
إذا بشارع تمر كلهم يغنون
وموالك يسلمه الجار للجار
النشيد العاطفي لشخصك يعزفون
وخبر حسنك تصدر نشرة أخبار
شباب شكَـد تمنوا لويصيدوك
وبخزرة عيونك صفوا طشار
زلم واجهت موت وإنت لوجيت
من شدة جمالك دخلوا إنذار
لأن ثورة جمالك هزة الكون
وحدر بيبان صدرك شفت ثوار
لاتصفن علي يالصفنتك سيف
وإذا تذبحني ياهو يطالب بثار
يالمطشر اليحبني واليكرهوك
وصفيت إلوحدي وماعندي أنصار
ونسيت إلي إجوا ولي يردون
وبقت بس صورتك بعيوني تذكار
وي غيري أشوفك بارد تصير
بس وياي أحسك تشتعل نار
وأخافن لاأحضنك روحي تموع
لأن من شمع روحي إوواهسك حار
عالي روج صدرك والشعر ليل
والحاجب سفينة وآنه بحار
أغمض حته بلكي أنساك وأرتاح
وأشوفك بالخيال وأبقى محتار
وتمنيت آنه أكدر أوصفك زين
وجبت دفتر حياتي الينزف أشعار
وياشاعر يوصفك حته يوفيك
وجمالك موطبيعي يطير الأفكار
يابوعيون سودة وتمطر دموع
وبساتين أعله خدك تشتهي أمطار
أحبك من زغر وأحلامنه بيوت
شجاك اليوم تبعد عني وشصار
بحضن أمك تنام الليل مرتاح
وأنه مكابل خيالك وأنزف أشعار
عتبة داركم لوتملك حساس
جاعنك تسولف عتبة الدار
من تعبر عليها تسودنت بيك
لأن شافت نهر مو مثل الأنهار
معجب مدري مغرم مدري أهواك
مدري تسودنت مدري العقل طار
من تضحك أحبك تبجي أهواك
لأن بالحالتين آنه أشتعل نار


سعدون التميمي
 




  • المصدر : http://www.kitabat.info/subject.php?id=40180
  • تاريخ إضافة الموضوع : 2013 / 12 / 06
  • تاريخ الطباعة : 2024 / 03 / 29