لمناسبة الذكرى الــ 93 لتأسيس جيشنا العراقي الباسل انشر القصيدة ، وللمعلومات نهر جاسم كانت اغلب الاصابات التي تعرض لها جنودنا البواسل هي في منطقة العين ولذلك اسميته بنهر العيون ...
توه اليل سلهم والطريق طويل
... وتوه النوم دغدغ صفنة عيوني
وصوت الفشكَـ أذن وي صلاة اليل
... ومن كِلة أحلامي ربعي ندهوني
مهضوم العراق شلون انام الليل
... غلطانين اذا اسكت يضنوني
مشيت ومهرتي تتسابكَـ اويه الريح
... وترس عيونهم عدواني شافوني
وكَـفت انه اعله طولي وليلي يمطر نار
... وانه مسودم وهمه الي يوازوني
اصبر جام خلكي وانه ميت شوكَـ
... واقزام بحجر كَـاموا يراموني
ثمن سنين وانه اويه المنيه اخوان
... لامر بيه خوف ولنخطف لوني
وانياب الرصاص مخاطف اعله الروس
... وعزرائيل يتركَـص على متوني
عراق وابد غيرك من يلوكَـ اوياي
... ولو رادو يذلونك يذلوني
وطبع روحي ابدوية وماتعرف الخوف
... وعدواني كَـبل ربعي يعرفوني
جفي بكل وجه منهم ترك نيشان
... صاكَـرهم صكَـر وشلون ينسوني
انه بصدري حميت العرب بالجولان
... ولاظميت راسي بيوم نادوني
ومن يوم العرفتك ياعراق الخير
... وعلى بابك هلي من الزغر دلوني
عرفت اليعتنيلي بروحي اعزب بيه
... وامد جفوفي سفرة لليزوروني
وطبعي انزف كرم لمن يجيني الضيف
... وكَـبل لايمد جفه يحضنه ماعوني
لان حبك بعيني توسد من سنين
... ولان عنك فلا كَـدروا يفرقوني
ولان شلت جرح من ساعة الميلاد
... ومن افزعت ماكَـدروا يردوني
ولان شفت اليموت لخاطرك يرتاح
... وشفت الدم قليل انطيتك عيوني
لذلك قررت اكَـضي العمر مكفوف
... وبظلمة عيوني خل يسجنوني
شظاياهم بعيني اجت ترس العين
... وبمرود حقد رادوا يكحلوني
طحت وتبسمرت جثة اعله طول الكَـاع
... واحس بربعي اجوني وهمه يخلوني
واسمع ياعلي ونشلت من الكَـاع
... ومثل زفة القاسم ربعي زفوني
وجرح ينزف جرح حد مشتهات الموت
... واحس روحي اتدله مجلبه بسنوني
بجت عين الربية من طحت مصيوب
... واجه شط العرب ويه اليودعوني
اكل عيني الدمع وانه بربيع صباي
... مو خايف وانتم زين تدروني
حسيني الدمعة انه وكربلائي النوح
... وانه بحب الحسين مكحل جفوني
من ثدي السواتر انه راضع موت
... ومن كبرت عالبارود فطموني
بعدهي عيوني فوك اعله الربية تبات
... وبعدني افزع اذا فد يوم نادوني
على عيوني اسئلك يانهر العيون
... توديهن الي يشوفني شلوني
كَـبل عيون عندي وما اميز زين
... اتيه مدري وين تخوني ظنوني
وهسه ابلا عيون واعتني الصعبات
... ضميري وعزتي همه اليكَـودوني
قناتنا على التلغرام :
https://t.me/kitabat
الموضوع السابققناتنا على التلغرام : https://t.me/kitabat
.jpg)
.jpg)
