........................

 

تظل يحسين خالد بالدهر وشما يطول – وْيظل اسمك علم عالي ابْاَمر رب الجلال 

 

علم باسمك يظل مرفوع دوم ابكل مكان – عله اسْطوح المنازل والقمم باعله الجبال

 

وْعزائك يالحبيب ابكل زمن اكبرعزاء – ابد ماينتهي اعْزاك او صعب يفنه او محال

لان حتى السماء اتنوح تندب عالمصاب – عجيب انت او فلا مثلك ابد مالك مثال

 

منو الضحه ابحياته اوْضحه بِوْليده الرضيع – وْمنوالجدّم بنينه اواخوِته او خيرالرجال

ادوّر وارد اعرفه او اقره عنّه ابْيا زمان – فلا مظلوم مثلك بالحقيقه او بالخيال

 

امام او اصلك الطاهر يبن فحل الفحول – شجاع او تشهد افعالك ميادين النزال

يبن بضعة محمد فاطمه الزهره البتول – نسب معروف شجره امباركه ابْنور اوْكمال

 

............

 

فخر هاشم يبو اليمه او فخر عدنان – وْيرمز الكل يثور او صرخة المظلوم

يعنوان الشجاعه يا عظيم الشان – وْيعنوان الصمود او سلوت المهموم

 

تِعَلمنه الصبر منّك يبو الاحرار – بْفخر اسمك حبيبي اعله الصدر مرسوم

تحدينه المنايه او ما يهمنه الموت – لان رسم الحسين اعله الگلب مختوم

 

نجيك اونهتف ابصحنك يبو السجاد – عله امْصابك حزن قايم يظل للدوم 

نظل ننعاك ابو اليمّه او فلا ننساك – نعم مولاي عاشورك تره ابكل يوم

 

لذلك نبقه نهتف يا حسين اوياك – نموت او ما نعوفك والعلي القيّوم

وحق ضلع الزچيه او جدك المختار – وْوحق حيدرعلي اوْابنه الزكي المسموم

 

.............

 

بْدماك الطاهره الدين انحفظ مولاي – نعم لله والْدِينه افتديت الروح

وْفديت ارواح احبابك اهل واصحاب – انس والجان لمْصابك تظل اتنوح

 

شهر عاشور احزانك يبو الثوار – حزن والام وهْلاله ابْعزائه ايْلوح

تصيح الدنيه والافلاك يا مظلوم – بْمساجدنه او مواكبنه مجالس نوح

 

الك تهتف ملايين ابعزه اطويريج – ابد والله ما ننساك يالمذبوح

وْتطوف ابكربله او تركض شباب او شيب – تصل يم گبرك اتنوح ابگلب مجروح

 

يبو السجاد ننعاك ابو ابد منجوز – وْلجل يومك يبو اليمّه فدايه انروح

رغم لِارهاب واذنابه او فتاوي الجور – نجي الگبرك نشم عطر الجنان ايفوح