ما نعيش ابذلّه ما نرضه ابظلم – وْلا حزب ظالم نريد او لا نكد

وْلا شعار الفرقه نرضه ابهالوطن – ما نريد الشر يعود الهالبلد

 

كافي منريد الاماني الزائفه – يا مته او يا يوم توفون الوعد

بْلايه راحه او لا حياة امأمنه – ربنه فرّجها علينه يا لاحد

 

والله ملّينه الوعود او هالجمل – صارعشر ْسنين لا حل او سند

وْما تصيرْحلول هالموقف يِظل – تْكررالمشهد نشوفه ابكل عهد

 

بْكل سنه اونتأمل يْصيرالفرج – تظهرالنه اصوات متحبّ السعد

كافي ملينه الكلام او هالزعل – لْهالسبب راحت ضحايه ابلا عدد

 

وشفنه الوان المصايب والفتن – نشكي للرحمن والرب الصمد

بْصوت نصرخ برّه كل حاقد نذل - والگلب واحد يظلّ ابهالجسد

 

دوم متوحدين باذن الله او نظل – بكربله او انبار خوّتنه الشهد

كل منافق ما يفرّق هالشعب – ما رضه بْتقسيم صامد واتّحد

 

وْهالشعب شعب السباع الما ركع – عالي راسه او مايطخ راس الاسد

منالشمال او للجنوب او كل ملل – بالعراق انعيش اخوه او للابد