أرد اكتب سوالف تخص هذا وذاك *----*----* ياريت القراهن كتب عنهن رد
طبع الطير من أنكشف عـنّه الليل *-----*-----* ضن بيه بعد ماينعاد هالغرّد
آنه الرايدك رغم الدمار البيك *-------**------* وادعولك توالي الليل وتعبّد
من تاهت سـفينة نوح بالطوفان *----*-----* والبيها أيّـست راح الغراب ورد
حمامه اتعنّتك والگت غصن زيتون *---*---* زفّت بيه ابشاره لنوح واهل المد
بيك أول انسان اتعـلّم التدويـن *-----**-----* وحروف الكتابه البدت تتجدد
بابل بيه أول ماتبلبل گـول *---*---*---*---* وتوسعت لهجات الأخذ والرّد
وانت البيك أول مانسن قانون *-----*-----* سـلّة حمورابي اليوم ألك تشهد
يالكلّك وعي ومنّك بدا التاريخ *-----*-----* شـرد أذكر صفات البيك ماتنعد
ناسـك ياعراق أصبحو ثلث اقسـام *-----*---- * والكل تنتسب لسمك بيوم العد
منهم طبع رجله بطين گاعك عوز *--*--* فك عينه اعلى ماكو بس غِده ويستد
وتعلّم اقرايه وكتب دار ودور *----*----* بحجرة طين واعلى ذراعه يتوسّد
ومن اتنفّهت قانع بستر الحال *-----*---*----* وبيوم الكلافه يصيرلك مبْرد
ياكل بالحديد ولايهمّه الجور *-----*----* واتوچه اعلى جرحه بيوم جد الجد
تحس بيه يللچم لوسـولف بطرواك *---*----* من فارگ اترابك وانجبر وبْعد
مايرجه التنفعه بكثر ماهم بيك *----*----* ودّه ايصير يوم الضيج ألك مسند
ومنهم ضال وسـطه يدوّر الختلات *---*---* طبعاً ماأجت ساعات ضيج وهد
مابيه منفعه مثل السـراب بگيض *-----*-*-----* لو گرّبت ليه ابساع يتبدد
سـبّاحة چوالي يوهّم الغرگان *----*-----* جاب اوياه كومه أحجارمن ينهد
لايمـشي بوعوره ولا تَعـدّه الگيـش *----*----* بالفرجات عنده ألسـان ماينرد
هذا أسـمه انتهازي وماعليه مشروه *----*----* لوعدّيت ربعك دوم ماينعد
بـس يبقى عراقي ونضل نترجّاه *----*----* بلكي يصير زين وضال يتردد
واللي خان مايك والملح والزاد *-----**-----* هـذا البالأصل ماينتسب لحّد
جاب اوياه حفنه امن الظلاميين *----*----* طبعاً مومنرضك جازي بيهم حد
عدهم تافهات ومعتقد مشبوه *-----**----* واحدهم ردي وملعون سابع جد
گالو ماتت أيده وماتهز مگوار *----*----* والجرحه غميج أيطيح بـس يبرد
طبعاً خاب ضنهم أنت ذاك الحيد *---*----* من يوجر صواب البيك تتشدد
ياطوْد التحمّل عاتيات الريح *-----*-----* مايدرون بالصعبات توگف سـد
وانت أطباع نابض والصفات البيه *----*----* بس ينزاح عنّه الضغط يتمدد
هولاكو والگبله وگبل گبله اهواي *----*----* والبعده بعـد لاتنحصى وتنعد
كلها اتحاشمت حتى غُـبار الكون *--*--* عاف ارض الخلگ وبگاعك اتمرّد
عاف ارض الخلگ وبگاعك اتمرّد
قناتنا على التلغرام : https://t.me/kitabat