( للحراميه فقط )
مشير السعيدي

 لاتشيل اگراب وتهد بالزماط

                           اولاتكد اعلى السبوگ امحدده

الناس عدها اعقول وتميز الشجاع

                           والسبوگ الموش گدها اتمدده

بالك اطاول سليل المكرمات

                           ساوي حلك يلا تصبح سيده

الله من يطيك دنجله ابخشوع

                          لاادوخ ابعد عطيته ااتحمده

لاتيمم چفك ابسحت اليتيم

                         اخذه ابحظان الابوه اووادده                        

لاتشيخ اعلى اليشيخك بالقرار

                        واليشيخك صيرعبده اومجده

موش تحسبهم عبيدك بالمظيف

                      اوصرت ابن خاتون وامك مسعده

لاتفيك بالمسدس عل الضغيف

                       اوبس يگلك ليش گمت اتهدده

وجهك ايجز والكرش وزنة طحين

                      والرعيه اوجوه ملحه امجعده

افرنجي قاطك والعطر منك يفوح

                       اوعسل تضرب والخدود امورده

والي ضحه اوسيدك ياكل فتات

                       اويطبخ المقسوم من ماي النده

ايفور جدرالمو حرامي ابلا غموس

                      والحرامي اشكال يطبخ بالغده

افطور رجله ايبات بيها العنكبوت

                      ايصوم جبرا والهدوم امسرده

حضيري يصفر دوم بجيوب الفقير

                      وانتوا شدات الالوف امكركده

انتم اتعيدون وي الراقصات

                     واحنه عيد الله ابدمعنا انعايده

احنه نشرب فوح بالحر والسموم

                     وانتم استيراد كلها امبرده

احنه سود ايامنه اوظلمه اوضباب

                        وانتوا حمره من السكر والعربده

الليل عامر للصبح فسق اومجون

                        اوتكفي ضعفين الحضور المائده

انلوچ حفنه اسنين صار ابچلمتين

                        بعثي تكفري اوذيول القاعده

الموت ناصب للفقير ابكل مچان

                       اوي كل اوذان ميه امبربده

وانتوا ملك الموت مامركم عجيب

                       ليش بس احنه نصلي بمعبده

بيها ان المسئله اووضحت تمام

                       انتوا علاسة دمانه امأكده

بگتوا كلشي اوكلشي ماشاف العراق

                          اوحتى بسمات اليتامه امفرهده

اشكثر صلفه اعيونكم تغفه اوتنام

                           اوليلها اتون اوتلوع الفاجده

مايرد هيهات عداد السنين

                         ابلايه جاه اوميته جوع الماجده             

لازم اطيحون  يل مامش ضمير

                         اوكلشي سويتوا شعبكم قيده

امدى گصصكم شلع كلكم رعاع

                         يااخس الناس يولاد الرده

 

مشير السعيدي

 

 

 

 

الموضوع السابق فاصل.... فلن تتحدثوا!

قناتنا على التلغرام : https://t.me/kitabat