زينب تنادي
سعيد الفتلاوي

جارت اعلينه الاعادي
يا ولينه يا ولينه
وبالم زينب تنادي
يا ولينه يا ولينه

........................


آنه بويه بهالمصيبه بكربله صرت الاسيره
ذبحو حسيني او صحابه والرضيع ابنه او سفيره
وانه واعياله انسبينه او مارعو فخر العشيره
بعزمك احنه ما ركعنه وباسمك انكمل المسيره
نهتف باسمك فخرنه سعرت النيران بينه


........................


روحي لحسيني تريده گلبي يمه او مايعوفه
افدي ابو اليمه ابحياتي تنجلي اهمومي مْنشوفه
اسمه عنوان الشجاعه تشهد الناس الطفوفه
مارضه بذله او مهانه كلها الاحرار ابصفوفه
اسمه يا بويه رمزنه وارث الهادي نبينه


........................


كربله التشهد وگفته خويه ابو النفس الابيه
وحده بالحومه او ينادي آنه ابن حامي الحميه
روحي افديها الامامي والله ما هاب المنيه
روحه عباس افتدها المذهبه او نصرت اخيه
بكربله حامل لوانه او ضحه ابشماله او يمينه


........................


وحشه بالغربه الليالي من بَعد فگد الحبايب
جيش ابن هنده السبانه او كثر اعلينه النوايب
من مدينه للمدينه شفنه يابويه العجايب
ابشع او افضع جريمه مامثلها بالمصايب
منك العزه او صبرنه بويه بيك احنه اعتلينه

........................


بمجلسه الطاغي يردد ثاري منكم آنه اريده
لا وحي منزل ينادي للكفر گاصد يعيده
ما يهمنه كل كلامه او ما يهمنه كل وعيده
احنه آيات الامامه واحنه عنوان العقيده
اكبر الايات جدنه تشهد الكوفه او مدينه


........................


نكرو الدين او اصوله لا معاد او لا قيامه
من اجل ابن الدعيه خانو الدين او امامه
والظلم عدهم وسيله للنفوذ او للزعامه
واللي حاربنه اوتجاسر رافگه الذل والندامه
للظلم لا ماركعنه الله ناصرنه او امينه

الموضوع السابق يُسرى

قناتنا على التلغرام : https://t.me/kitabat