قصيدة / زينب اجتي مْحزّمه ( گعده )
سعيد الفتلاوي

ظلم وْ الم من يحمله

بارض الطفوف بْكربله
زينب اجتي مْحزّمه

بْصبر الزچيه الغانمه

...................

للعقيله ام الهواشم بالهموم حسين اجاها
تنظر الحرّه الفخرها مهجة الگلب وْ رجاها
وْتصغي لاهوال المصيبه مْصيبة الوالي وْ حماها
يْصبرها لاخته عالالم – وِيْگلها صبري عالظلم
والينتقم ربنه الحكم – ينظر الطفنه وْ دماها

روحي يزينب راحله – مْصيبة عزائي نازله
باچر تصير الملحمه – وَيه العصابه الظالمه

...................

يْگلها صبري عالمصايب وحدچ ابديره غريبه
ولدي وَاصْحابي وْاِخوتي تِنذبح والكل سليبه
وْجثتي يختي وحيده مْسلّبه گبالچ جريبه
نصبر يخيتي عْله القدر – وْ ذِكري يِدوم وْ يالدهر
باچر رحيلي والسفر – ساعة اوداعچ عصيبه

حرّه وْ كريمه مْعدله - صبرچ جبل مَيعادله
عندچ خبر ومْعلّمه – انتي العزيزه العالمه

.................

ينذبح بدر الهواشم يضحي للدين وْ اميره
حامل الرايه وْ فخرنه مفخرة اشرف عشيره
هذا ابو الغيره المجاهد ابن الاقمار المنيره
حامل لوائي بالمحن – درعي وْ اميني بالفتن
يِتخلّد اسمه وْيالزمن – بْعزمَه تمشي هالمسيره

بالغيره ياهو يْماثله - يْضحي القضيته العادله
ربنه العزيز يْكرمه – يعله شانه وْ يالسمه

...................

عشتي يختي بالمآسي وْيگضي عمرچ بالمصايب
تهجم اخيول الاعادي وْ تحرگ اخيامي النواصب
تنسبي اطفالي وْعيالي وْتكثر اعليچ الطلايب
حفظي يخيتي هالعهد – بْگلبچ تْسجلينه وعد
صوتي يدوم وْ للابد – بثاري كل ثائر يِطالب

نقره الدعاء وْ بسمله – الراعي الجلاله الكامله
نفسي القدرها مْسَلّمه – وْروحي الضعنكم لازمه

...................

ينذبح طفلي وْ حبيبي مْن الگماط يْطلّع ايده
مْدمّه لامه من ارجعه عالطفل تبچي وْ تريده
صعبه لوعتها وْ اليمه بْهالفجيعه وْ هالمكيده

ومن النحر دمّه يصب – يْلَوّع مصابه كل گلب
وْلا يومي مثله بْكل حرب
مْودّعچ سكنه وْ رقيه والعليله البالمدينه

الموضوع السابق إضاءاتٌ نقديّةٌ لِديوان "سلامي لكَ مطرا"/ للشّاعرة آمال عواد رضوان

قناتنا على التلغرام : https://t.me/kitabat