أبوذيات هيفاويات بكائيات لم أنتبه لهن
ناصر علال زاير

 ياراي

يهوفه اعليج دمعي انهار ياراي

وحرت يافكر اتبعه وياج ياراي

من نوحي تراهو شال ياراي

أعتقد نوحي يشيل أمريكه أهيه

من هوانه

يهوفه دوم نهو منهوانه

وشمه أنتي يهوفه منهوانه

تعرفيني يهوفه منهوانه

أضفرج ما أبدلنه بتسع ميه

ملايين

الحديد أيلين وكليبج ملايين

ومعوفج كون ينطوني ملايين

يهوفه أتروحلج فدوه ملايين

وبعد بوسي ولطيفه التونسيه

ولاهان

أفراكج ماسهل عدنه ولاهان

وزمانج عيب ذل النه ولاهان

القصايد بس الج هوفه ولاهان

عيوني من دمه لجلج جريه

وداوي

 

الكلب ثاكب على احبابي وداوي

عليهم تنزف اجروحي وداوي

مثل صوت النحل كلبي وداوي

وشبه نوح المثجله صاربيه

ولانت

الدش بجفاك مايعجب ولانت

وروحك لوصخر حنت ولانت

لايس أسمعت منك ولانت

سكتك طولت يشكر عليه

ياهل

ياصدكان ياخلان ياهل

كتلانه بهوانه أنسان ياهل

ياجوري يعطر أهواي ياهل

ياعنبر مسج ويفوح اليه

ويازبده وتموع أبين أديه

وميلي

يدنيه كربي أعلينه وميلي

وأصد لعكرب الساعه وأميلي

أفتح صفحتي ونتي وأميلي

ولامنك رساله جتي اليه

بدنه

ناحل من جفه هوفه بدنه

مبيد تكول حب هوفه بدنه

عليهم والوكت لاتظن بدنه

العهد ثابت يهوفه للمنيه

دلالي

أشكثر هم بهجر هوفه دلالي

عليه ولا صبر لحظه دلالي

يهوفه ليش ماغزر دلالي

ودلالج لاتزودينه عليه

مردنه

عنك جيش صهيوني مردنه

وغيرك ياحلو أبدا مردنه

هجرك ياترف كلش مردنه

وجفاكم خربط أوضاعي عليه

تردني

حبيبي عالحزن مالك تردني (تعيدني للحزن)

وعلى سوالف الموزينه تردني ( تره أدني لاسامح الله)

حبيبي لوصدك فعلا تردني (تريدني)

كبل سنتين جا جيتوا عليه

مراده

جم واحد كصد كلبي مراده

ومنج صار دلالي مراده

كلبي أيريد من عندج مراده

ونوالج طال ياهوفه عليه

نوبه ضايج

نوب أرتاح منج نوبه ضايج

نوبه الدهر واسع نوبه ضايج

أنفه الثوب نوبه نوبه ضايج

ونوب أوكع طريح أعل الوطيه

ماعمنه

غير الطيب هوفه ماعمنه

أشكثر عانات شفنه ماعمنه

جفي من لمس خده ماعمنه

مثل زبده وتساكط بين أديه

ويقولون الشهيد من مات عن عرضه أو مات عن ماله

فنقول

شهاده

مايحتاج الج هوفه شهاده

أبحبي وياج ما توكف شهاده

يهوفه الموت لعيونج شهاده

لأن أنتي العرض والمال اليه

وعن تأخر هيفاء الحسيني عن زيارة للناصريه بعض الشيء

مايلينه

يواعدنه الحسيني ومايلينه

صخر كلبه ونحيبي مايلينه

حبيبي كون ترسل مايلينه

مامقبول اله تمر عليه

مايلينه

بحر كلبج يهوفه مايلينه

وعن ديرة محبتج مايلينه

بين أكلوب ربعج مايلينه

بس كلبج حنين يون عليه

ملاحظه هذه الأبوذيات عندما أنقطعت عني مولاتي العلوية أسبوع فأعتذرت لي وأقسمت أنها كانت مريضه جدا

كتبن 30/8/2010

ناصرعلال زاير----- عاشق من ذي قار 

 

الموضوع السابق مـزامـيـر الـسـاهـرالـبـابـلـيـة

قناتنا على التلغرام : https://t.me/kitabat