حرامية السنّة وحرامية الشيعة
اياد السماوي

المقالات لا تُعبر عن وجهة نظر الموقع، وإنما تعبر عن رأي الكاتب.

اليوم الناس صبّحت كل ثنين بسالفة حول الكلام اللي نشره أسامة النجيفي بصفحته الخاصة على الفيسبوك , وفضحه للحديث اللي جرى بينه وبين صالح المطلك , واللي طلب منّه أن يوكف وياه ويقنع رئيس البرلمان سليم الجبوري بعدم إجراء الاستجواب اللي رافعه عليه مشعان الجبوري , بس الأخطر من كل هذا , الكلام اللي كاله صالح المطلك لأسامة بأن عمار الحكيم أوعده أن الشيخ همام حمودي نائب رئيس البرلمان ما راح يوّقع على طلب الاستجواب المرفوع عليه من قبل النائب مشعان الجبوري على خلفية الفساد وسرقة أموال النازحين الي يحجي عنها مشعان الجبوري , وطبعا هاي القضية اللي أثارها مشعان ما راح تطمطم لو تنطبق السماء على الأرض , لأن الشغلة أولا انفضحت ومشعان الرجال دك بيها بوقي ما ظل واحد ما سمعه , وثانيا هاي القضية استقطبت تعاطف كل الناس , لأن ما معقولة واحد تدنه نفسه على فلوس هذولة المظلومين اللي فقدوا كل شي , يعني معقولة هذا البوك والنهب كله ما شبع صالح المطلك وزمرته حتى يجي يلحك على فلوس هاي الوادم المساكين اللي حالهم يبّجي حتى الحجر ؟ , ولهذا من يجي واحد يسرق من حال هاي الوادم وينكشف للشعب بالوثائق والأدلة , أكيد الناس كلها راح توكف ضدّه وتطالب بتقديمه للقضاء , خصوصا والمتهم بهاي السرقة هو صالح المطلك اللي هو بنظر الناس مكروهة وجابت بنت , هسه أحنه ما ندري الكلام اللي كاله صالح المطلك عن عمار الحكيم صحيح لو لا , هاي هم مو صعبة بعد يومين تبين , فإذا الشيخ همام حمودي رفض التوقيع مثل ما كال صالح المطلك , فهذا يعني أنّ كلامه صحيح , ولو أنا بيني وبينكم استبعد هذا الشي تماما , لأن ما معقولة لواحد مثل همام حمودي يدخل جهنم على حساب صالح المطلك , وهذا من سابع المستحيلات , هسه مو عمار يطلب منّه , لو يطلع جد عمار ألله يرحمه من كبره ما راح الشيخ همام حمودي يسويها .
بالله بربكم وبدينكم منو جان يتوّقع من مشعان الجبوري تطلع منّه كل هاي السوالف والطلعات المعدّلة , قبل فترة قليلة كشف للشعب العراقي تفاصيل مذبحة سبايكر ومنو اللي نفذها وبالأسماء , واليوم جايب بالوثائق والأدلة شلون أموال هذولة المساكين انصرطت على أيدين هذولة السفلة اللي كال عنهم الدكتور نبيل جاسم ( هذولة من يا ملّة ومن يا طينة ) , تدرون هسه مشعان الجبوري إذا يرشح من أي محافظة شيعية راح يفوز بشكل ساحق , الناس جانت تتأمل بفائق الشيخ علي يقوم بهذا الدور , لأن فائق جان ثابر الدنيا أنا وأنا وراح أسوي هيج وراح أكعدلهم ركبة ونص وراح افضح فسادهم وراح افتك اليمني , تالي ما تالي لا فتك اليمني ولا نزل على الدبانستري , عبالنه راح يكشف حرامية الشيعة مثل ما مشعان كشف حرامية السنّة , وبيني وبينكم الشيعة ينرادلهم واحد وكح ونجر مثل مشعان , مو يسدون حلكه بجم فلس ويطمطم خياسهم , والشيخ همام حمودي إذا سوّاها وما وقع على الاستجواب , وهذا محال كما اعتقد , والله اللي ما تلتم أطرافه الشعب العراقي راح يطلعهم هو وعمار بالجلا ......... .

الموضوع السابق سعد البزاز ..تاريخ مليء بالفسق والفجور !!

قناتنا على التلغرام : https://t.me/kitabat